విశాఖ ఘటన... యువతి ఆత్మహత్య కేసులో ఆరుగురు అరెస్ట్

విశాఖపట్నం నగరంలో తీవ్ర కలకలం రేపిన ఘటనలో, స్నేహితులు తనపై దాడి చేశారన్న అవమానభారంతో ఓ యువతి ఆత్మహత్య చేసుకుంది. పుట్టినరోజు వేడుకలో జరిగిన ఈ ఘోరానికి సంబంధించి ఆరుగురు స్నేహితులను పోలీసులు అరెస్ట్ చేశారు.

వివరాల్లోకి వెళ్తే.. జోడుగుళ్లపాలెంకు చెందిన శాంతికుమారి (27) తన స్నేహితులతో కలిసి ఏప్రిల్ 14న రాత్రి విశాలాక్షినగర్‌లోని ఓ లాడ్జిలో పుట్టినరోజు వేడుకలు జరుపుకుంది. ఈ పార్టీలో అందరూ మద్యం సేవించారు. ఈ క్రమంలో, తన గురించి శాంతికుమారి తప్పుడు ప్రచారం చేస్తోందని సాయికిరణ్ అనే స్నేహితుడు ఆరోపించడంతో వారి మధ్య గొడవ మొదలైంది. మాటామాటా పెరగడంతో ఆగ్రహానికి లోనైన సాయికిరణ్, యశ్వంత్, లక్ష్మీ సౌజన్య కలిసి శాంతికుమారిపై దాడి చేశారు.

స్నేహితుల దాడితో తీవ్ర మనస్తాపానికి గురైన శాంతికుమారి, లాడ్జిలోని మరో గదిలోకి వెళ్లి తలుపు వేసుకుంది. ఎంతసేపటికీ బయటకు రాకపోవడంతో అనుమానం వచ్చిన స్నేహితులు తలుపులు పగలగొట్టి చూడగా, ఆమె ఫ్యాన్‌కు వేలాడుతూ కనిపించింది. వెంటనే ఆసుపత్రికి తరలించినా, అప్పటికే ఆమె మృతి చెందినట్లు వైద్యులు నిర్ధారించారు.

విషయం తెలుసుకున్న శాంతికుమారి తల్లి రమ్య పోలీసులకు ఫిర్యాదు చేశారు. ఈ ఘటనపై విశాఖ వెస్ట్ ఏసీపీ నరసింహమూర్తి మాట్లాడుతూ, నిందితులు దాడి చేసిన మాట వాస్తవమేనని, అయితే స్నేహితులు కొట్టారన్న బాధతోనే ఆమె ఆత్మహత్య చేసుకుందా లేక దాడి కారణంగా మరణించిందా అనే కోణంలో దర్యాప్తు చేస్తున్నామని తెలిపారు. ప్రాథమికంగా ఆత్మహత్యగా భావిస్తున్నట్లు చెప్పారు. నిందితులైన ఆరుగురిని అరెస్ట్ చేసి, ఆత్మహత్యకు ప్రేరేపించడం (అబెట్‌మెంట్ టు సూసైడ్) సెక్షన్ కింద కేసు నమోదు చేసి రిమాండ్‌కు తరలించినట్లు వెల్లడించారు. ఈ ఘటన నగరంలో చర్చనీయాంశంగా మారింది.